e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Avugadia ecclesiastica
En il dretg feudal era l'avugà ecclesiastic (lat. advocatus) in laic incumbensà da defender ils interess seculars d'ina abazia u d'in chapitel. Il term tud. correspundent, Kast(en)vogt, cumpara oriundamain en las funtaunas da l'intschess alemanic-svabais, per l'emprima giada il 1130 (diplom dal retg Lotar III, transcripziun dal 15. tsch.), ma spez. en il temp medieval tardiv, cura ch'ils novs signurs territorials, titulars da questa funcziun, revenditgavan il dretg da proteger e survegliar abazias e chapitels catedrals. Quai als permetteva d'intervegnir en la gestiun economica da las instituziuns ecclesiasticas (il term tud. Kasten signifitga graner), da controllar la giurisdicziun che quellas possedevan e da represchentar las instituziuns sezzas vers l'exteriur e davant dretgira, obtegnend per recumpensa entradas da l'avugadia ecclesiastica.
En il temp medieval tardiv è l'avugadia ecclesiastica passada dals signurs feudals a las vischnancas u als cumins - quella da la claustra da Mustér p.ex. al cumin da la Cadi (1401), quella da l'uvestgieu da Cuira a la LCD (1409).
Litteratura:
Deutsches Rechtswörterbuch 7, 1974-83, 539-41.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Avugà da spenda