Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Maillart, RobertMainone, Felice lemma sequent

Mainardi [Mainardo], Agostino
* 1482 a Caraglio (Piemunt), † 31-7-1563 a Clavenna. Frater eremit da l'Urden da S. Augustin. Rectur da la scola claustrala da S. Augustin a partir dal 1516 e priur dal convent da S. Mustiola a Pavia a partir dal 1533, nua ch'el è s'engaschà ens. cun Celio Secondo Curione per la derasaziun da las ductrinas refurmatoricas. En quel senn ha M., in oratur excellent, predegià en occasiun da las messas da curaisma a Roma il 1538, Vaniescha il 1540 e Milaun il 1541. Questas pregias han purtà ad el in process per eresia, dal qual el ha pudì mitschar tras fugia a la fin dal 1541. Il 1542 è el sa domicilià a Clavenna, nua ch'el è sa deditgà, en stretg contact cun Heinrich Bullinger, a la construcziun d'ina baselgia ref. ch'el ha pastorà fin a sia mort. Defensur fervent da l'ortodoxia ref. en ina regiun da cunfin, nua che blers fugitivs religius tal. avevan chattà in refugi. El era entretschà en numerusas polemicas, o.t. cun Camillo Renato, davart l'interpretaziun da la Sontga Tschaina. Tr. sias ovras stampadas figureschan il «Trattato dell'unica et perfetta satisfattione di Christo» (1551), ina preschentaziun da las ductrinas essenzialas dal protestantissem, e l'«Anatonomia della messa» (1552; franz. 1556, lat. 1561). M. ha redigì ultra da quai ina professiun da cardientscha (1547) ch'era vegnida approvada da la Sinoda retica.


Litteratura:
A. Armand-Hugon, Agostino M., [1943]; S. Caponetto, La Riforma protestante nell'Italia del Cinquecento, 1997²; Bonorand, Reformatorische Emigration.

Emidio Campi

lemma precedents Maillart, RobertMainone, Felice lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :