Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents DiggDirecziun chantunala da tiradurs lemma sequent

Diogg, Felix Maria
* 1-7-1762 ad Ursera/UR, † 19-2-1834 a Rapperswil/SG, da la Val Formazza (Piemunt), burgais da Rapperswil dapi il 1791. Figl da Johann Columban, scrinari, pictur, surdorader e pur, e da Catrina n. Deflorin, da Tschamut (vischn. da Tujetsch). ∞ 1792 Anna Elisa (Lisette) n. Curti, figlia da Karl Ludwig, maister da mastergnanza. Suenter il grond incendi d'Ursera dal 1766 è la fam. sa domiciliada a Tschamut. Il 1780 ha l'avat da Mustér, Columban Sozzi, intermedià a D. in emprendissadi da pictur a l'Academia d'art da Besançon (tar Johann Melchior Wyrsch). Dal 1785-88 ha D. vivì en l'Italia. Persequità politicamain, è el alura turnà a chasa ed ha absolvì (tutgà d'ina greva melanconia) in curt noviziat en la claustra da Mustér. Il 1789 ha el purtretà avats ad Ursera ed a Nossadunnaun. Il pictur e scrivant da la citad, Felix Christoph Cajetan Fuchs, ha alura clamà D. a Rapperswil, nua che quel ha realisà dal 1790-91 purtrets dals Curtis, dals Fuchs e da numerusas autras famiglias burgaisas, daventond il purtretist classicistic il pli impurtant da la Svizra. Influenzà da las ideas da la Revoluziun franz., ha D. crititgà il 1794 en ina brev averta l'ipocrisia da l'aristocrazia da Rapperswil. Il 1797 ha el scuntrà Goethe a Stäfa, nua ch'el ha realisà il 1798 la «Freiheitstafel für die vom Zürcher Rat gemassregelten Patrioten». Il pictur politicamain engaschà era savens en viadi: el è sa trategnì en la Svizra Orientala, a Berna ed en la Svizra franz. (1799-1809), pli tard en l'Alsazia ed a Karlsruhe, nua ch'el ha purtretà il 1814 la zara russa Elisabeth Alexejevna. Turitg è però restà il center da ses operar. La plipart dals purtrets da D. han ina concepziun simpla e tradeschan in ferm senn per ils detagls. Da ses giuvens onns dateschan ils maletgs da s. Gieri a Sedrun (clutger) e da Nossadunna a Breil (Casa Cavegn).



Litteratura:
F.B. Venzin, Felici Diog, il pictur de Tujetsch, en: Cal. Rom., 1922, 78-89 (cun autopurtret); W. Hugelshofer, Felix Maria D., ein schweizerischer Bildnismaler, 1762-1834, 1941; V. Hendry, Il pictur da Tujetsch, 1972; BLSK, 266-68.

Tapan Bhattacharya

lemma precedents DiggDirecziun chantunala da tiradurs lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :