e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Biert, Annamengia Biert, Linard  Biert, Cla * 26-7-1920 a Scuol, † 19-3-1981 a Sent, ref., da Scuol. Figl da Gisep, pur ed ustier, e da Nesa n. Taisch, da Scuol. ∞ 1953 Angelica n. Menzel. Seminari scolastic a Cuira, studi da mag. secundar a Turitg, Losanna e Genevra. Magister a Ftan 1947-51, Zuoz 1951-56 e Cuira 1956-75. Scriptur realistic impurtant, trubadur e cabarettist. Sias emprimas collecziuns da raquints tematiseschan l'adolescenza, l'erotica e la violenza: «Pangronds» (1949), «Amuras» (1965), «Laina verda» (1957). Actur, cun Men Rauch e Jon Semadeni, en la gruppa da teater ambulanta «La Culissa» (1947-56) e confundatur da l'emprim cabaret rum. «La Panaglia» (1951) e «La travaglia dal docter Panaglia» (1954). L'ovra principala da B., il roman «La müdada» (1962), tematisescha il midament rasant d'ina societad purila tradiziunala ad ina societad pluralistica dal suenterguerra. Las descripziuns minuziusas da la vita dal vitg en tut sia varietad sociala, culturala e linguistica dat al roman il caracter d'in vast inventari etnologic. En il center dal raquint stattan l'amur tr. il giuven pur Tumasch Tach e la ritga Danaisa Karin sco era il conflict intern da Tumasch tr. l'attaschament a la patria ed il desideri da partir, tr. il vulair manar vinavant la puraria dals geniturs e l'emigraziun. Bun'accoglientscha ha chattà il cudesch «Fain manü» (1969) che porta il suttitel «Istorgias per uffants» e che cumpiglia ina tscherna dals emprims raquints da B. En ses cudesch sinoptic «Il descendent- Der Nachkomme» (1981) s'occupa il narratur-jau da la figura d'in bab dominant, darar amuraivel e savens smanatschant. Il cudesch «Las fluors dal desert» (1993), publitgà postum da la fam., cuntegna istorgias da giuventetgna e raquints da siemis dal relasch litterar da B.; questas istorgias mussan che l'ovra da B. n'è betg mo caracterisada d'in realissem serius e comic, mabain era da l'interess per la simbolica e la psicologia dal subconscient. Archiv: ASL, relasch. Ovras: BR, nrs 629-36. Litteratura: Bezzola, Litteratura, 505-11; Deplazes, Funtaunas 4; Riatsch/Walther, Literatur und Kleinsprache; LTS, 198 s.; C. Riatsch, "Ina gustusa minestra"? In tschercha dad ingredienzas da «La müdada» da Cla B., en: Annalas, 118/2005, 57-91; Lectüras da "La müdada" da Cla B., edì dad A. Ganzoni, C. Riatsch, 2008. Clà Riatsch  Biert, Annamengia Biert, Linard  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: