e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Looser, Elias
* 13-10-1802 ad Alt St. Johann/SG, ref., dad Alt St. Johann. Figl d'Andreas e dad Anna Katharina n. Bösch. ∞ Maria Barbara n. Ruedi, da Tusaun. Assistent educatur (atun 1823) a l'institut da Philipp Emanuel von Fellenberg a Hofwil (vischn. da Münchenbuchsee/BE). Aderent da las metodas pedagogicas da Johann Heinrich Pestalozzi e da l'ideal educativ da Fellenberg. Il 1825 è el sa domicilià a Tusaun, ed il 1826 ha el avert a Farschno in institut per mats dad 8-20 onns cun ina purschida da roms fitg vasta. Sco comm. da la Societad da scola evang. ha el propagà la furmaziun da creschids (cun access als gimnasis) ed è s'engaschà per l'educaziun dals paupers ed orfens. Il 1833 ha L. intimà il Chantun da fundar ina scola agricula per paupers ed ha concepì l'emprim project concret per ina scola da purs professiunala (o.t. per la cultivaziun dad ers, l'allevament da muvel e la tgira dal guaud). El ha era intimà da promover l'industria indigena per franar l'emigraziun, era quella stagiunala (p.ex. dals Schuobacheclers e spazzachamins). Il maun public ha dentant refusà da sustegnair ses plans. Il 1839 ha el bandunà il Grischun ed ha transferì ses institut da Farschno ad Altstätten/SG. Ses figl Emil Fürchtegott è stà activ sco reverenda en il Grischun dal 1853-73.
Litteratura:
H. Chresta, Das landwirtschaftliche Bildungswesen im Kanton Graubünden in seiner Entwicklung bis zur Gegenwart, 1947; C. Roedel, Pestalozzi und Graubünden, 1960, 236-46, 280-85.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Londra