Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Punt-Chamues-ch, LaPuntcrap lemma sequent

Punt/Rehanau, La
Fracziun da la vischnanca polit. da Tumein, situada a la confluenza dals Rains Anteriur e Posteriur. L'impurtanza da l'abitadi da La P. è d'attribuir a sia situaziun ideala sco punct central dal traffic tras la Val dal Rain da Cuira, la Surselva e la Sutselva ed al chastè da Rehanau sco center administrativ dal Signuradi da Rehanau. Fin a la construcziun da duas punts sur il Rain a la fin dal 14. tsch. ha prob. existì in traffic da navetta a La P. Il 1399 è menz. per l'emprima giada ina Zollbrugg sur il Rain Anteriur. En il 14. tsch. è vegnida erigida ina punt sur il Rain unì che tanscheva da l'uschen. Käppelistutz fin al pe dal posteriur chastè da R. Enturn il 1570 existiva a La P. prob. mo ina chasa da duana che serviva era d'ustaria e che sa chattava presumtivamain al lieu da l'Hotel Adler odiern. L'impurtanza da La P. sco center da punts è creschida tras l'abandun da la Punt Arsa a Domat ch'aveva servì fin alura al traffic sur il Lucmagn. Il 1755 ha l'inschigner appenzellais Johannes Grubenmann realisà al lieu da la punt actuala cun ina construcziun temeraria ina nova punt cuverta. Il 1799 han las truppas revoluziunaras franz. battì il landsturm da la Surselva a La P. ed han dà fieu a la punt. Il 1819 è quella vegnida reconstruida tras Johann Stiefenhofer da l'Allgäu, ma il 1881 è ella puspè brischada ed è alura vegnida remplazzada tras ina punt da fier; ina tala è vegnida erigida il 1889 era sur il Rain Anteriur. Il 1896 è vegnida construida la staziun da la VR Rehanau-Tumein sin il territori da Domat.


Litteratura:
Kdm GR 4, 23-26; P. E. Müller, Reichenau, en: Graubündens Schlösser und Paläste 1, 1969, 40-47; F. Jörimann, Die Rheinübergänge in Reichenau und Umgebung, en: BM, 1996, 371-428.

Linus Bühler

lemma precedents Punt-Chamues-ch, LaPuntcrap lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :