e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bavier, Simeon [Simon] Bavolin  Bavier, [von] Famiglia da cuss. da Cuira, domiciliada a Says. Ils B. èn sa natiralisads a Cuira il 1527 (Michael) ed il 1528 (Sylvester). Els eran prob. originars da la Baviera e sa scrivevan Pawier u Bawier. Gia en la segunda generaziun è Hans daventà burgamester da Cuira e chau da la LCD. La fam. è alura adina stada represchentada en il Cussegl da citad ed ha mess, ens. cun ils Tscharners, la plipart dals burgamesters. Andreas, figl da Hans, è stà mess da las Trais Lias ed ha obtegnì da l'imp. Rudolf II il 1610 in diplom da noblezza ed in doc. da vopna, sco quai ch'ina tavla eraldica dal 1616 conferma. Pauc pli tard è la fam. sa dividida en tschintg lingias, tuttas residentas a Cuira. Ils B. èn stads chapitanis en servetsch venez., alura en servetsch franz. ed ollandais; auters èn stads uffiziants en Vuclina, giurists, medis e plevons. Economicamain è la fam. stada activa fin viaden il 20. tsch. surtut sin il champ da la spediziun e dal commerzi, en il 18. tsch. era en affars bancars. La firma Simon & Johann Baptist Bavier è stada en il 19. tsch. confundatura da la Banca per il Grischun. Enturn il 1900 cumparan ils B., confurm al temp, sco inschigners en la construcziun da vias, dad ovras idraulicas e da viafiers, ma era sco impressaris en Svizra ed a l'exteriur. Gia enturn il 1750 aveva in Franz avert l'emprima filandaria da mangola a Seglias, a la quala el aveva agiuntà pli tard ina tessaria. A la fin dal 18. tsch. avevan ils B. realisà ina vasta rait da producziun da taila da mangola (producziun decentrala). Enturn il 1850 eran els participads decisivamain a la Spinnerei Meiersboden AG a Cuira. Els manavan interpresas commerzialas a Turitg ed a Marsiglia, ina chasa da saida en il Giapun e minieras da charvun en China. Politicamain eran els activs sco parlamentaris chant. e fed. radicals. Cun Simeon han els mess il 1878 l'emprim Grischun en il Cussegl federal. Era sche blers magistrats purtavan il titel da noblezza ed eran s'alliads tras maridaglia cun fam. pussantas sco ils Salis, han els acquistà in domicil signuril (ina part dal chastè da Rehanau) pir vers la fin dal 18. tschientaner. Litteratura: E. von Bavier, Stamm-Tabelle der Adeligen Familie von B. aus Chur in Hohenrhätien [...], 1892; Churer Stadtgeschichte 2; Simmen, Wappen, 231 s. Max Hilfiker  Bavier, Simeon [Simon] Bavolin  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: