e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bornatico, Remo Borroni [Borrone], Broccardo  Borromeo, Carlo * 2-10-1538 ad Arona (Piemunt), † 3-11-1584 a Milaun, da Milaun. Figl da Gilberto, cont d'Arona, e da Margherita n. de Medici, sora da Giovanni Angelo, il posteriur papa Pio IV. Il 1560 è el vegnì incumbensà cun l'administraziun da l'archidiocesa da Milaun. Consecraziun a l'uvestg 1563, cardinal da S. Prassede a Roma 1564. Il 1566 ha B. prendì domicil stabel a Milaun ed ha cumenzà immediat ad exequir las directivas dal Concil da Trent. In'attenziun spez. ha el dà als chantuns cat. da la Confed. ed a lur terras subditas tessinaisas, suttamessas a la giurisdicziun ecclesiastica da Milaun ch'el ha visità pliras giadas en il decurs da ses episcopat. Il 1581 ha el fatg ina visita privata a la claustra da Mustér (dus dis) ed il nov./dec. dal medem onn in viadi da missiun en il Mesauc ed en la Val Calanca, nua ch'el ha instradà inquisiziuns rigurusas e sanguinusas cunter eretics e strias. En questas regiuns è el vegnì undrà en numerusas baselgias e chapluttas. Gia il 1560 è B. vegnì nominà sin iniziativa dals chantuns cat. "protector Helvetiae". Sias visitas pastoralas e diplomaticas en ils chantuns cat. han permess ad el da sa far in maletg da la situaziun morala e materiala difficila, en la quala sa chattavan tant il clerus sco era la populaziun, e da stgaffir la basa per ina vasta refurma spirituala. Cun l'intent da meglierar l'instrucziun e la disciplina dal clerus e da franar a medem temp la diffusiun dal protestantissem, ha B. postulà il 1579 l'instituziun d'ina nunziatura permanenta en la Confed. che, causa la resistenza da la curia rom., è dentant vegnida stgaffida pir il 1586. Il 1579 ha B. fundà a Milaun il Collegium Helveticum, destinà a la furmaziun dal clerus svizzer e dotà cun 50 stipendis. Intimads da quest exempel èn ils gesuits cumparids il 1579 a Lucerna e pli tard er a Friburg ed a Porrentruy, entant ch'ils chaputschins, grazia al sustegn dal nunzi apostolic da la Confed., Giovanni Francesco Bonomi, han dà vita a lur missiun en la Svizra Interna (Altdorf, Stans e Lucerna). Considerà sco exempel dad in uvestg tridentin, è B. vegnì canonisà il 1-11-1610; el è il patrun da la Svizra catolica. L'onn 1693 è cumparida en la stampa Maron a Panaduz la versiun rum. da sia «La suentra veglia del'olma en fuorma de testament [...]». Litteratura: G. Cahannes, Die Pilgerreisen Carlo B.s nach Disentis im August 1581, en: Zeitschrift für Schweizerische Kirchengeschichte, 18/1924, 136-65; R. Boldini, Documenti intorno alla visita di San Carlo B. in Mescolcina, en: QGI, 29/1960, nr 4; 31/1962, nr 2; HS I/1, 42; I/6, 355 s. Pablo Crivelli  Bornatico, Remo Borroni [Borrone], Broccardo  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: