Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Bühler, ValentinBührig, Marga lemma sequent

Bühler [Püchler, Püehler], Andreas
Attestà tr. il 1478 (cudesch da chamona tirolais) ed il 1512 (baselgia paroch. da Flem), oriund da Gmünd (Carinzia), domicilià a Tusaun il pli tard il 1496. Avant la recepziun en la corporaziun dals tagliacrappa da la Val da l'En (1478) ha B. fatg durant plirs onns in emprendissadi da tagliacrappa (prob. en la Carinzia). Enturn il 1478 è el stà activ sco giarsun en il vegl chastè a Gmünd. A partir dal 1487 cumpara el sco tagliacrappa, polier e maister en il Grischun, nua ch'el ha participà a la construcziun da pliras baselgias-sala cun arvieut, realisadas en stil gotic tardiv. B. è doc. per l'emprima giada il 1487 sper ses maister Stephan Klain, medemamain Austriac, en la baselgia parochiala da Luzein. Ens. cun Klain ha el era contribuì, per part sco polier, a la realisaziun da las baselgias da Pralung (1488), Scharons (1490) e Samedan (1492). L'emprim edifizi planisà e construì autonomamain da B. è la baselgia parochiala da Sta. Maria en Val Müstair (1492). El ha era projectà u almain gidà a construir las baselgias parochialas da Ruschein (1493-96), Poschiavo (1497), Cazas (baselgia parochiala 1496-98 e claustrala 1504), Vaz-Zorten (1499), Tusaun (1506), Ziràn (1509), Stussavgia (1510) e Flem (1512). Fitg prob. ha el era participà decisivamain a la realisaziun d'ulteriuras baselgias en il Grischun. Dals maisters, ch'han influenzà fermamain la construcziun da baselgias en il Grischun enturn il 1490-1510, è B. in dals paucs enconuschents per num. Sias baselgias, savens simplas ma spaziusas, sa distinguan tras l'execuziun artisanala precisa dals arvieuts.


Litteratura:
Kdm GR 1-7.

Nott Caviezel

lemma precedents Bühler, ValentinBührig, Marga lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :