Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Caminada, ChristianCaminada, Johann Mathias lemma sequent

Caminada, Christianus
* 6-1-1876 (Rest Giusep) a Surin (vischn. da Lumbrein), † 18-1-1962 a Cuira, cat., da Vrin. Figl da Giachen Gieri, pur e chatschader, e da Madalena n. Gartmann, da Lumbrein. Gimnasi a Mustér ed a Nossadunnaun. Stud.teol. ad Alassio (Liguria) ed a Cuira. Ordinaziun sacerdotala 1900, alura plevon a Dardin 1901, Sursaissa 1905 e Trun 1912. Il professer e politicher cristian-social Caspar Decurtins ha influenzà durablamain il giuven plevon da Trun, svegliond en el l'interess per ils problems socials e l'engaschament per las scolas catolicas. El ha era savì transmetter a ses discipel o.t. l'amur per la folcloristica retica e religiusa. A Trun ha C. terminà la «Crestomazia Retorumantscha» da Decurtins. Il 1919 è el daventà decan, il 1920 plevon da la catedrala ed il 1934 vicari general a Cuira. Il 1941 è el vegnì numnà e consecrà uvestg da Cuira. Da sias enconuschientschas d'istorgia d'art, acquistadas autodidacticamain, ha profità tr.a. la restauraziun da la catedrala (1921-27). Grazia a sias vastas cumpetenzas sin quest champ è el vegnì recepì en il comité da la Societad svizra d'istorgia d'art ed en la cumissiun dal Museum naz. svizzer. Il 1961 è cumparida sia ovra «Die verzauberten Täler» cun retschertgas davart ils cults da l'aua, dal fieu, da la crappa, da las plantas, dals animals e dals ers, cultivads dals emprims colonisaturs da la Rezia. Il 1942 ha la facultad teologica da l'Univ. da Friburg concedì ad el il dr.h.c. C. è stà in uvestg da grond'influenza politica (cons.), ch'ha però mess relativamain paucs accents religius-pastorals; el aveva in stil da reger asper e moderà; grazia a sias experientschas pastoralas aveva el sviluppà in senn per soluziuns pragmaticas; ses pleds eran originals, plain umor ed autoironia; mintgatant al mancava però la sensibilitad en il contact cun il clerus da l'uvestgieu. C. ha manà ina vita simpla da muntagnard; sia statura pitschna e magra e sia fatscha marcada dals onns han conferì ad el cun l'ir dal temp tratgs patriarcals ed ascetics. Undrà cun il Curtin d'onur da la LG a Trun.


Archiv:
Aepisc. Cuira, relasch.

Litteratura:
HS I/1, 504 s.

Albert Gasser

lemma precedents Caminada, ChristianCaminada, Johann Mathias lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :