e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Canova, Gaudenz Cantieni  Canova, [von] Famiglia da ministerials curretics dal Surses, ils members da la quala eran oriundamain homini proprii dals baruns de Vaz e da l'uvestgieu da Cuira e chavaliers. A Tinizong, lur probabla residenza principala, menziunescha in doc. dal 1280 relativ a l'ospizi da S. Peder sin il Pass dal Set in dominus Uolricus miles de Canofa cun ses frars Concius, Jacobus e Hanricus. Il 1295 èn vegnids repartids ils uffants dad Ulrich von C. tr. l'uvestg da Cuira ed ils baruns de Vaz. A l'entsch. dal 15. tsch. èn attestads ils frars Jacob, Peter ed Andrea cun bains a Suagnign. In Jacobus era il 1396 derschader da la LCD; Peter († 27-8-1412 a Tinizong), maridà cun Thönia Planta, era il 1406 avugà episcopal a Greifenstein; Andrea era maridà cun Luna Planta; Johann, spiritual e rectur da la baselgia parochiala da Vaz, possedeva il 1417 ina curtis a Zorten (vischn. da Vaz). En il passà han ins adina puspè sminà ch'il chastè-fortezza, che cunfinava cun il bain dals von C. a Pasqual, fiss la sedia dals signurs von C.; quai è dentant strusch pussaivel, perquai che quel chastè sa numnava Nüwe Sins (Novi Süns)fin la fin dal 14. tschientaner; igl è percunter probabel che quest possess a Pasqual vegniva gestì d'in rom dals von C., essend menziunà il 1351 in Heinrich C. sco garant per l'uvestg da Cuira. In auter rom da la fam. è sa domicilià a Domat (Gaudenz), nua ch'ils C. èn attestads dapi il 1433. Funtaunas: Codex diplomaticus, 4 ts, edì da T. e P.C. von Mohr, 1848-63; BUB 3. Litteratura: W. von Juvalt, Necrologium Curiense, 1867; Clavadetscher/Meyer, Burgenbuch, 65, 121-23. Martin Bundi  Canova, Gaudenz Cantieni  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: