e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Carisch, Otto [Nott] Carl, Gregor (von Hohenbalken)  Carl Famiglia da ministerials da la Val Müstair, domiciliada durant il temp medieval surtut a Müstair. Il num da fam. sa referescha prob. a Carl il Grond, il fundatur legendar da la Claustra da S. Jon a Müstair. Il predicat "von Hohenbalken" (rum. de Balcunaut, Balcunault, Balcun At, Travaulta) sa referescha prob. ad in chastè cun il medem num, situà aut sur la val al sid da Müstair. Ils emprims exponents da la fam., attestads a Müstair, èn in Karolus de Monasterio (1193) ed in Carolus operarius (1289). En il 14. e 15. tsch. èn attestads plirs C. sco ministerials episcopals, tr.a. in Josef de Balcunault (1391, 1401). Il 1427 ha Janutt Carl de Balcunat presidià sco mastral ils giuraders ch'han decretà ils statuts civils e criminals da la val. Hans, chapitani dals Grischuns al Pass S. Gliezi (1499), ha fundà il rom da Cuira, dal qual deriva Gregor che residiava sin il Karlihof. A l'entsch. dal 17. tsch. cumparan plirs members da la fam. C. a la testa da la partida venez. en Val Müstair. Nikolaus è sa participà, cumbain cat., ens. cun Gieri Genatsch ed auters sco in dals "quatter Tells" a l'assassinat da Pompejus von Planta ed a la campagna militara en Vuclina il 1621. En il 16. e 17. tsch. èn trais exponentas da la fam. stadas abadessas en la claustra da Müstair. Auters members dals C. èn doc. en il 16. tsch. a Trun, tr.a. Jacob Wolf, maiordom da la claustra da Mustér, mastral da la Cadi e landfoct a Maiavilla. Ils C. da Trun, che derivan prob. dal rom da Müstair, èn entrads en il 14. e 15. tsch. en servetsch da la claustra e residiavan oriundamain sin il chastè da Travaulta al sid da la Punt Russein. En il 17. e 18. tsch. èn morts ora ils roms principals da Cuira e da la Val Müstair. Represchentants da la fam., cun e senza titel da noblezza, cumparan a Scuol, Susch e Tarasp (Kaspar, ✱1736; Kaspar, ✱1781); lur derivanza dals C. von Hohenbalken n'è betg cumprovada. Litteratura: H. Bruppacher, Die Carle von Hohenbalken, en: BM, 1937, 218-22, 235-53; Grimm, Aristokratie, 208; Simmen, Wappen, 158 s. Martin Bundi  Carisch, Otto [Nott] Carl, Gregor (von Hohenbalken)  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: