Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents ComCommerzi da laina lemma sequent

Comander, Johannes
* ca. 1485 (Johannes Dorfmann) a Maiavilla, † entsch. 1557 a Cuira. Evtl. figl d'in chapeller. Scola da lat. a S. Gagl (commiliton da Vadian). Studis a Basilea a partir dal 1502, inscunter cun Zwingli. Sacerdot, tr.a. vicari ad Escholzmatt/LU. Il 1523 è vegnì clamà C. a S. Martin, la baselgia principala da Cuira. El ha cumenzà a predegiar qua la Refurma ch'è s'imponida (cun excepziun dal quartier episcopal) avant la fin dal 1527. Refurmatur principal da Cuira e d'ina gronda part dal Grischun, cun l'agid da Jakob Salzmann, magister a la scola municipala, e dal 1530-50 da Johannes Blasius. C. è era stà l'oratur principal a l'impurtanta Disputaziun da religiun da Glion (1526). En quest'occasiun ha el redigì 18 tesas, fundadas sin ils 67 artitgels da Huldrych Zwingli dal 1523; quellas han servì da basa a las tesas bernaisas dal 1528. Il 1538-39 ha el transfurmà cun Blasius ed auters refurmads la claustra da dominicans da S. Nicolai a Cuira en ina scola da lat. da la LCD. Il 1537 ha la Dieta da las Trais Lias aderì a sia dumonda da crear la Sinoda evang.-retica. C. ha redigì in urden da baselgia per Cuira (1545) e cun Philipp Gallicius, il successur da Blasius a la S. Regula, la «Confessio Raetica» che la Sinoda ha adoptà il 1553. Il catechissem, scrit ens. cun Blasius, è mantegnì sulettamain en la translaziun rum. da Jachiam Bifrun (refurmatur da l'Engiadin'Ota), stampada da Dolfino Landolfi a Poschiavo il 1552. Sco aderent da Zwingli ha C. defendì la ductrina eucaristica e cumbattì ils anabaptists (p.ex. Andreas Castelberger). El è s'opponì ultra da quai al servetsch mercenar. Ses correspundents e cussegliaders principals èn stads Zwingli e Heinrich Bullinger a Turitg sco era Vadian a S. Gagl.


Funtaunas:
Bullingers Korrespondenz mit den Graubündnern 1, edì da T. Schiess, 1904; Zwinglis Briefwechsel, 5 ts, 1911-35.

Litteratura:
W. Jenny, Johannes C., 2 ts, 1969-70; C. Bonorand, Vadian und Graubünden, 1991.

Conradin Bonorand

lemma precedents ComCommerzi da laina lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: