Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Condrau, GionCondrau, Pius lemma sequent

Condrau, Giusep
* 16-1-1894 a Mustér, † 6-10-1974 a Mustér, cat., da Mustér, vischin d'onur da Mustér e Trun. Figl da Giachen Giusep. ∞ Lucrezia n. Durgiai, da Mustér. Gimnasi a Mustér e Sviz, stud.iur. a Friburg, Turitg e Berna, dr.iur. («Das parlamentarische Zweikammersystem unter besonderer Berücksichtigung des Schweizerischen Bundesstaates», 1932). Proprietari e directur da la Stampa Romontscha Condrau SA 1922-72, e medem temp editur e redactur da la «Gasetta Romontscha» a Mustér. Comm. dal Cussegl grond per il cirquit da la Cadi 1923-57 (pres. 1930), mastral da la Cadi 1933-37, pres. da la PCD 1942 e da la PPC (oz PCD) dal chantun Grischun 1943-48, cuss. naz. 1935-63 (pres. 1957), comm. da 118 cumissiuns, tr.a. da tut quellas permanentas.
Cun ina interpellaziun parlamentara (1936) ha inizià C. sin il plaun politic fed. la renconuschientscha dal rum. sco lingua naz. (1938). El ha suandà Josef Escher (nominà cuss. fed.) sco directur da la gruppa parlamentara per il mantegniment dals interess da la populaziun muntagnarda, nua ch'el è s'engaschà tr.a. en favur d'ina lescha d'agricultura, da la perequaziun finanziala e da la vendita da muvel. Sco pres. da la fracziun (1954-60) ha C. contribuì decisivamain a la conquista dal terz mandat dals Conservativs en il Cussegl fed. ed a la creaziun da la furmla magica dal 1959. C. è stà per mintgamai var 20 onns pres. da la dretgira distr. dal Rain Anteriur, da las OE Surselva e da l'Uniun purila Surselva. El è stà ultra da quai pres. da l'administraziun da la Viafier Furca-Alpsu 1955-68 e da l'Associaziun svizra dals editurs da gasettas e revistas 1960-72. Il 1974 ha el obtegnì il Premi da Radio e Televisiun da la CRR. El è stà comm. d'onur da la Romania e comm. da las uniuns studenticas Alemannia, Fryburgia e Turicia. Sco persunalitad da gronda paisa politica, fidaivla als princips cat., è C. stà durant decennis in exponent principal da la Surselva e da las regiuns da muntogna.
 


Ovras:
Ina vusch ord il parlament fed., 1935-63, elav. da D. Cadruvi, 3 ts, 1976-78.

Litteratura:
P. Metz, Die Bündner Nationalratspräsidenten, en: BJb, 1986, 28.

Adolf Collenberg

lemma precedents Condrau, GionCondrau, Pius lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: