Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Decurtins, CarliDedual, Johann Josef lemma sequent

Decurtins, Caspar
* 23-11-1855 a Trun, † 30-5-1916 a Trun, cat., da Trun. Figl da Laurenz Christian, medi e mastral da la Cadi, e da Margaretha Catrina de Latour. Biadi da Caspar Theodosius de Latour, nev da Caspar de Latour, da Breil. ∞ 1879 Anna Maria Lucia n. Geronimi, da Glion. Gimnasi a Mustér 1868-70 ed a Cuira fin il 1875. Studi d'istorgia, istorgia d'art e dretg public a Minca e Heidelberg, dr.fil. 1876, alura in semester a Strassburg. D. è creschì si en il ravugl illuministic-lib. da la fam. Latour. Il 1874 è el vegnì exclus da la secziun Cuira dals Zofingians suenter esser daventà in ultramontan. Il 1875 è D. entrà en l'Uniun da students svizra (StV). Carriera politica: mastral da la Cadi 1877-83, comm. dal Cussegl grond 1877-1904. Sco cuss. naz. 1881-1905 ha el appartegnì a l'ala sociala dals Cat.-conservativs. Suprastant (a partir dal 1888) e pres. 1902-05 da la fracziun cat.-conservativa. En il Grischun è D. stà manader dals Cat.-conservativs entaifer l'Allianza fed.-dem. (dapi il 1885). Sco ultramontan è el però stà, per quai che reguarda la politica sociala, pli datiers dals Socialists che dals Cat.-cons., tenor la devisa: "La fom n'è ni catolica ni protestanta". Sco mastral da la Cadi ha D. inizià suenter il 1877 la restauraziun da la claustra da Mustér ed ha eliminà cun Anton Steinhauser ils Cat.-lib. sco forza politica en Surselva ed en il Grischun. Fidaivel a Roma e collià cun l'ideal da la democrazia rurala, ha el defendì ils dretgs dal pievel en general, l'autonomia com. en il chantun Grischun ed il federalissem sin plaun federal sco ils megliers garants dals interess politics e religius dals catolics. Sco politicher social e sociolog ha D. giudì renum internaziunal. Il 1887 ha el fundà, ens. cun Herman Greulich, Heinrich Scherrer e Theodor Curti, l'Uniun da lavurers (interconfessiunala) ed il Secretariat dals lavurers ed il 1889, ens. cun Ernst Feigenwinter, l'Uniun dals umens e lavurers catolics. Confundatur (1897) e suprastant (fin il 1909) da l'Uniun purila svizra. A l'intern da la Partida cat.-cons. ha el constituì, ens. cun Feigenwinter e Joseph Beck, la direcziun cat.-sociala ed ha sviluppà, ens. cun il cuss. fed. Louis Ruchonnet ed ils cuss. naz. Curti e Georges Favon, la politica sociala federala. Il 1887 ha D. inizià, ens. cun Favon, l'emprim (ed unic) congress internaz. per la protecziun dals lavurers ch'ha unì il 1897 a Turitg cristians e marxists. D. è era stà in exponent impurtant da la politica agrara ed industriala social-conservativa. Igl è difficil da chapir l'universalitad e las cuntradicziuns dal spiert, da l'intellect e dal caracter da D. El era abel da ludar ils scolastichers sco era Mazzini e Lassalle e da venerar a medem temp il papa Leo XIII ch'el ha cusseglià en la concepziun da sia enciclica sociala «Rerum Novarum» (1891). A partir dal 1890 è D. s'engaschà per la fundaziun d'ina partida cat. sin plaun fed., impedind a medem temp ina tala en il Grischun. El ha battì per sias ideas cun in zeli apostolic e senza prender resguard dals amis ed inimis. En ils onns 1890 ha el pers constantamain electurs en il Grischun, e cura ch'ils Conservativs han cumenzà a partir dal 1900 da furmar, ens. cun ils Liberals, in bloc burgais cunter la sanestra (socialistica) e da concurrenzar cun atgnas organisaziuns da lavurers e mastergnants las organisaziuns cristiansoc. da D., è quel sa retratg, dischillusiunà, da la politica. Dal 1905-13 è D. stà prof. d'istorgia culturala a l'Univ. da Friburg ch'ha d'engraziar ad el sco confundatur o.t. la recrutaziun dals emprims professers. Suenter in cumbat sventirà cunter il modernissem (Anton Gisler), è el daventà in vegl inasprì.
Da grond'impurtanza è la «Crestomazia retorumantscha» da D. che furma il coc litterar ed istoric-cultural da la Renaschientscha retorum. a la sava dal 19./20. tschientaner. A quella ha el dà substanza e forza gia en ses giuvens onns: sco iniziant da «Nies Tschespet» (1891) e da l'«Ischi» (emprim redactur da quel 1897-1906), e sco fundatur spiertal da la Romania studentica (1896). Autur da numerus studis singuls davart la cultura, litteratura e politica.


Archiv:
Bclaustr. Mustér, relasch.

Litteratura:
K. Fry, Kaspar D., 2 ts, 1948-52; Gruner, Bundesversammlung 1, 613 s.; Arnold Büchi, Gründung und Anfänge der Universität Freiburg i.Ü., edì dad I. Baumer-Müller, 1987; R. Klinkert, B. Büsser, Caspar D., en: Sagenerzähler und Sagensammler der Schweiz, edì da R. Schenda, 1988, 419-39; Deplazes, Funtaunas 3, 50-54; J. Flury, Decurtins Kampf um die Kirche: Antimodernismus im Schweizer Katholizismus, 1997.

Adolf Collenberg

lemma precedents Decurtins, CarliDedual, Johann Josef lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: