e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Banca Chantunala Grischuna (BCG) Bandiera  Bancas Avant il 1800 n'han betg existì bancas en il Grischun. Ins produciva sez il bler e pajava en natiralias. Tgi che basegnava daners emprestava quels o.t. da spediturs a Cuira (Massner, Bavier, Fischer, Dalp e.a.) u da l'aristocrazia e da la signuria locala. En il 18./19. tsch. accordavan era plaivs e chaplanias credits (p.ex. Morissen). Il 1808 è vegnida fundada a Cuira ina cassa da spargn che concediva credits favuraivels. Speculaziuns falladas e la concurenza tras la Cassa da spargn chant., fundada il 1847, han mess ina fin a quella il 1850. L'onn 1862 han spediturs e commerziants da Cuira fundà la Banca per il Grischun per fatschentas grondas. La Banca commerziala, fundada il 1865 per la clientella pitschna, è vegnida remplazzada il 1870 da la Banca Chantunala Grischuna (BCG). Ses retgav vegniva impundì a l'entschatta per reglar il quint da las vias e pli tard per finanziar la construcziun da la VR e da l'Institut da provediment Riòlta. La Banca per il Grischun ha mess en circulaziun atgnas notas fin il 1880, la BCG fin a la fundaziun da la Banca naziunala il 1907. Enturn il 1900 èn s'engaschadas uschen. bancas da turissem cun sedia en ils centers turistics en la finanziaziun d'hotels e da la viafier: en l'Engiadina la Banca Töndury a S-chanf (ina banca privata fundada il 1856 da Gian Töndury, a partir dal 1888 Banca d'Engiadina J. Töndury & Cie. a Samedan), a Tavau la Bank für Davos (fundada il 1896, a partir dal 1908 Rhätische Bank). A S. Murezzan ha fatg Rudolf Bavier era da banchier en ses Hotel Belvédère (1896-1905), alura ha el vendì quella part a la Banca da S. Murezzan. L'Emprima Guerra mundiala ed ils onns da crisa suandants han influenzà a moda negativa ils affars bancars. Tuttas trais bancas da turissem han stuì capitular: la Banca da S. Murezzan è vegnida integrada il 1919 en la Banca populara svizra, la Rhätische Bank il 1930 en la Credit Suisse; la Banca d'Engiadina è vegnida liquidada il 1934. Il medem onn ha la Banca per il Grischun fatg scussiun ed è vegnida remplazzada il 1935 da la Banca privata grischuna (fin il 1963). Era la BCG ha gì grevs decennis pervi da ses engaschament en l'hotellaria ed en l'agricultura. La Cooperativa da credit grischuna, fundada il 1914 cun agid da la BCG, e la Schweizerische Hotel-Treuhand-Gesellschaft, fundada il 1921 cun subvenziuns fed., duevan segirar la survivenza dals hotels. L'agricultura è vegnida sustegnida a partir dal 1932 o.t. da la Cassa d'agid per purs (alimentada p.p. dalla BCG). L'economia interna è vegnida promovida a partir dal 1927 da la bursa grischuna cun sedia a Cuira (commerzi cun palpiris da valur e cun martganzia). L'emprima Cassa Raiffeisen dal Grischun è vegnida fundada il 1910 a Zezras. Quels instituts, organisads sin basa cooperativa, vegnivan manads durant decennis en occupaziun secundara e servivan als basegns da l'agricultura e da la mastergnanza locala. Litteratura: Las cassas de Raiffeisen, en: Il Glogn, 11/1937, 135 s.; Töndury, Volkswirtschaft, 144-56; F. Maissen, La pleiv sco institut da beneficenza ed emprest [...], en: Annalas, 90/1977, 153-73; D. Decurtins, S. Grossmann, Auf Gedeih und Verderb, 1994; HbBG 3, 82-84. Adolf Collenberg  Banca Chantunala Grischuna (BCG) Bandiera  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: