e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bernhard, Oscar Bernina  Berniers Term per designar las persunas che transpurtavan martganzia cun agid d'animals da sauma. Berniers eran activs o.t. en las vals alpinas participadas al traffic nord-sid, ma era en numerusas vischnancas per transportar graun als mulins d'aua ed enavos. Entant ch'ins sa mo pauc dals berniers engaschads en il traffic local, existan doc. en furma dad urdens e rapports da viadi davart quels ch'effectuavan il traffic internaziunal. Sin las duas axas da transit principalas dal Grischun, la Via Sura (Set/Güglia-Malögia) e la Via Sut (Spleia/S. Bernardin), ha existì in traffic da sauma regular dal temp rom. fin viaden il 19. tschientaner. La Via Sut tr. Cuira e Clavenna (staziuns finalas) era charrabla fin a Tusaun (viturins), nua che berniers surpigliavan alura il transport da la rauba, e quai durant l'entir temp. La Via Sura era per part charrabla gia en il temp rom., uschia che la martganzia pudeva vegnir transportada da viturins cun barellas. Dapi il temp medieval era però il traffic da sauma puspè la regla. Ils berniers sa participavan al traffic da transit ubain en organisaziuns furmadas d'abitants da las vischnancas (per las rutas dal Bernina, da l'Alvra e dal Lucmagn), ubain en ils ports furmads d'abitants da las valladas (per la Via Sura e la Via Sut). Il mastergn da bernier pudevan exequir mo quels che possedevan il dretg com., v.d. quels ch'avevan il dretg d'astg e pastg sco era il dretg d'utilisar las alps e d'explotar la laina e las auas, che disponivan da bains privats (ers e prada) e che possedevan manadiras, inclus l'equipament. Questa premissa sa basava sin l'idea ch'il bernier duess avair en mintga mument avunda pavel per ses animals da sauma. Il bernier fascheva adina era il pur, ma mintga pur n'era betg in bernier. A l'intern da las corporaziuns da vischnancas e valladas valeva per ils berniers inscrits l'uschen. roda, q.v.d. ch'ils berniers avevan da transportar immediat la martganzia ch'ils scumpartiders als deposits da rauba (sustas) attribuivan ad els. Ils berniers purtavan damai la rauba en roda d'ina susta a l'autra. Las rutas da Cuira a Clavenna avevan sis tschancuns. Mintga corporaziun participada al transport en roda aveva da procurar sezza per l'amplificaziun ed il mantegniment da ses tschancun. Per questa lavur aveva ella il dretg d'incassar ina taxa (pedagi). Ils berniers vegnivan remunerads da lur incumbensaders per il transport da la martganzia. En il temp modern è sa derasà, ultra dal sistem da transport en roda (tud. Rodfuhr), era l'uschen. transport da sauma express (tud. Strackfuhr, tal. adirittura). La martganzia vegniva transportada dals medems berniers sin l'entir traject sur ils pass alpins. Il transport era uschia pli spert e pli segir, ma era pli char. Per in express da Cuira a Spleia duvrava il currier dus dis e da là a Clavenna dus ulteriurs dis a mintgamai tschintg uras viadi il di, entant ch'ils berniers duvravan sis dis e dapli per transportar en roda la martganzia sin quel traject. Ils chavals purtavan per regla ina chargia da trais unitads (brels/ballas) a 50 kg; in bernier aveva per ordinari sis fin set chavals (stab da chavals). La lavur da bernier era diraglia ed exposta a blers privels; blers berniers disgraziavan a mort u vegnivan malsauns e murivan baud, auters sa devan al baiver e gievan uschia a frusta. Ma era ils berniers ferms e sauns na gudagnavan betg fitg bler: il gudogn supplementar a quel da l'agricultura cuvriva solitamain gist ils custs da transport. Dapi la transfurmaziun dals passadis alpins ils pli impurtants en vias charrablas (ca. 1823) ha il mastergn da berniers pers sia impurtanza. Litteratura: Schnyder, Handel und Verkehr 1; H. Minsch, Der Bündner Säumer, en: Bü. Kal., 1974, 52-54; P. Caroni, Soma et alpis et vicinale, en: Festschrift für Ferdinand Elsener zum 65. Geburtstag, 1977, 97-110. Martin Bundi  Bernhard, Oscar Bernina  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: