Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Bündner Monatsblatt (BM)Bündner Zeitung (BZ) lemma sequent

Bündner Tagblatt (BT)
Gasetta dal di fundada a Cuira il 1852 dals tipografs Pargätzi & Felix cun il num «Tagblatt für den Kanton Graubünden»; il 1853 ha ella obtegnì il num BT. Politicamain neutrala, ma da tendenza lib., è la gasetta, realisada sut la direcziun da Christian Tester, daventada in dals fegls ils pli derasads en ils onns 1857-71. Suenter la midada da possess il 1870 (Emil Meyer-a Marca, Placidus Plattner, Hermann Sprecher) e la demissiun da Tester il 1872, ha il BT sustegnì la politica cons. ed è daventà il 1921 l'organ da div. partidas conservativas. En ils onns 1970 ha la gasetta survegnì difficultads finanzialas ed ha perquai collavurà successivamain per tscherts temps cun il «Freier Rätier», l'«Ostschweiz» ed il «Rheintaler». Il 1977 è il BT sa declerà independent da tuttas partidas politicas. Dapi il 1-7-1978 cumpara el sut il num «Neues Bündner Tagblatt», cun integraziun dapi ils 3-1-1979 era da la «Bündner Post» (ediziun regiunala). Il 1986 ha Christoph Blocher, da quel temp cuss. naz. turitgais da la PPS e directur da las Ovras da Domat, acquistà la maioritad da las aczias dal BT ch'ins temeva da stuair liquidar. Il 1996 è la gasetta vegnida integrada operativamain en la Gasser Media SA (oz Südostschweiz Presse SA), ils pachets d'aczias dal BT èn dentant restads en possess da Blocher. La gasetta, redacziunalmain independenta, surpiglia la part dals inserats da l'ediziun regiunala grischuna da la «Südostschweiz». Il 2007 dumbrava l'ediziun dal BT 10'567 exemplars.


Litteratura:
Foppa, Deutschsprachige Presse, 33-53.

Ernst Bollinger

lemma precedents Bündner Monatsblatt (BM)Bündner Zeitung (BZ) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: