e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Confisca
Ils 20-10-1797 ha Napoleun Bonaparte decretà l'incorporaziun da las anteriuras Terras subditas da las Trais Lias en la Republica cisalpina. Ils 28-10-1797 ha il comité revoluziunar (Comitato Provvisorio permanente di Vigilanza e Corrispondenza) proclamà la confiscaziun da tut las valurs da facultad da Grischuns en Vuclina, a Buorm ed a Clavenna. Pertutgads eran members da passa 100 fam. e da nov corporaziuns, tr. quellas vischnancas, plaivs e claustras. Grondas perditas han subì tr.a. ils Salis e la claustra da Mustér. Ils donns vegnan stimads a ca. 3.6 miu. rentschs. Las emprimas stentas per ina revocaziun da la Confisca, che steva en cuntradicziun cun il dretg dals pievels (internaziunal), u almain per ina indemnisaziun dals pertutgads, dateschan gia dal 1797. Ma l'Austria, successura legala da la Republica cisalpina, ha renconuschì principialmain il dretg d'indemnisaziun dals Grischuns pir il 1815 al Congress da Vienna. L'uschen. Confiscacomité, constituì il 1816 da set commembers, tr. ils quals temporarmain tschintg exponents da la fam. von Salis, ha cuntanschì il 1834, suenter lungas tractativas cun la diplomazia austr., la restituziun dad 1'642'372 florins (che correspundan a ca. 45% dals 3.6 miu. rentschs). La repartiziun da quests daners als donnegiads dal 1797 ha durà fin il 1862. Las perditas tras la Confisca han indeblì la basa economica da numerusas fam. che n'èn per part betg pli sa revegnidas.
Litteratura:
G. Dermont, Die C., 1997; HbBG 2, 168 s.
Silvio Margadant
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Confessiun retica