Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Guler , Johann Peter (von Wyneck)Guler, Hans lemma sequent

Guler
Schlatta d'uffiziants e da nobels da Tavau, domiciliada pli tard era a Malans e Cuira. Cura e danunder che la schlatta è arrivada a Tavau n'è betg enconuschent. Tenor la «Rhetische Cronica» da Fortunat Sprecher è stà in Lucas il 1322 chapit. dals da Tavau; el duai avair participà sco tal da la vart dals de Vaz en in conflict cun l'uvestg da Cuira. En ina documentaziun da las schlattas da Tavau da la mesadad dal 15. tsch. manca però il num G. La genealogia nuninterrutta da la fam. cumenza cun Peter. Tenor Hans Ardüser è quel stà in dals manaders da las truppas da la LDD en la Guerra da la Chalavaina (1499). Ses figl Hans è daventà, sco emprim represchentant da la schlatta, landamma da Tavau e cun quai a medem temp era chau da la LDD. Fin il 1621 han ils G. occupà quest uffizi per almain anc ulteriurs 28 onns (Johann Peter, Peter). Alura èn els sparids dals registers dals chaus-lia. Suenter la Sentenzia da Waser (1644), ch'ha abolì la cumulaziun dals dus uffizis surmenz., na chatt'ins pli nagins G. tr. ils landammas da Tavau enconuschents per num. Il Hans surnumnà è stà il 1531 l'emprim uffiziant da la fam. en Vuclina. En il decurs dal 16. tsch. han ils G. occupà anc quatter giadas uffizis en Vuclina, la davosa giada il 1569. Il 1550 ha la fam. obtegnì il titel da noblezza da la curt austriaca. En il 16. e 17. tsch. èn stads plirs G. uffiziers, o.t. en servetschs venez. e franzos. Il zenit politic e socio-economic ha cuntanschì la fam. cun il politicher, uffizier e cronist Johannes che sa numnava tenor il pitschen chastè de Wynegg (Wyneck, Weineck) sur Malans ch'el era s'acquistà tras maridaglia. Wynegg è restà il domicil da la fam. fin en la segunda mesadad dal 18. tschientaner. En il 16. e 17. tsch. eran ils G. s'unids  tras maridaglia cun ils Buols, Gugelbergs von Moos, Salis e Sprechers, simplas colliaziuns han existì tr.a. cun ils Castelmurs, Hartmannis, Menhardts, Meyers (schlatta da cuss. da Cuira), Otts, Plantas, Schmids von Grüneck e cun Rahns da Turitg.


Litteratura:
A. Mooser, Die G. von Wyneck, en: BM, 1934, 129-52, 161-84; Grimm, Aristokratie, 225; Simmen, Wappen, 161 s.

Silvio Färber

lemma precedents Guler , Johann Peter (von Wyneck)Guler, Hans lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :