Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Marmels, Conradin deMarmels, Jon lemma sequent

Marmels, de
Famiglia da chavaliers e ministerials cun residenza sin lur chastè-fortezza sper Murmarera. L'emprim member attestà è Andreas (1160), ministerial da l'uvestg da Cuira, dal qual el possedeva en feud ina part dal chastè da Tarasp. Il 1193 ha el (u ses figl cun il medem num) rapinà en num da l'imperatur il legat cardinal Cintius sin la ruta dal Set ed empraschunà el sin ses chastè. Cun plirs members influents da la noblezza retica ha Nannus concludì il 1219 la pasch tr. l'uvestg da Cuira e la citad da Com. Il 1293 cumpara Andreas sco terza perditga tr. ils nobiles et barones che conferman l'allianza d'amicizia tr. l'uvestg da Cuira ed il ducadi da Milaun.
Dal 14.-16. tsch. èn stads activs numerus exponents da la fam. M. sco interprendiders, ministerials, politichers e spirituals. Els controllavan per gronda part il traffic da transit sin il Pass dal Set, possedevan las minieras dal Surses e dapi il 1338 ils implants per l'extracziun da mineral da fier cun galarias e furns en la Val d'Err sper Tinizong. Els èn stads chastellans da l'uvestg da Cuira en div. valladas, o.t. a Riom e Greifenstein e cumparan ultra da quai sco derschaders, uffiziers u mess. Johannes era canoni da Cuira il 1350. Dietegen presidiava ina dretgira da cumpromiss episcopala a Cuira il 1396; el ha renovà en pli il contract d'allianza da la LCD il 1406, ha cumandà l'emprima conquista da Clavenna il 1407 ed è daventà cont sin la Fürstenburg en il Vnuost il 1411. Il 1459 han ils de M. obtegnì il dretg da burgais da Cuira. Nicolaus è stà avat da Mustér dal 1439 al 1448. Tr. il 1461 ed il 1511 han sis members da la fam. studegià ad universitads europeicas, tr.a. Conradin, decan dal chapitel catedral da Cuira 1471-1504, Ulrich, l'emprim Grischun ch'ha predegià la nova cardientscha (enturn il 1523) a Scharons, e ses frar Georg, refurmatur dad Eigias (enturn il 1532). Catharina è stada abadessa da Cazas enturn il 1541.
L'exponent il pli influent da la fam. è stà Conradin ch'ha acquistà enturn il 1500 il signuradi da Razén ed è vegnì nominà in dals trais chaus feudals da la LG. La pussanza dals de M. è anc s'augmentada cun l'acquist dal signuradi da Lantsch Sut e l'occupaziun da l'uffizi da burgamester da Cuira tras Rudolf e da la podestataria da Castels tras Hans e Hans Jörg 1523-96. La vita pumpusa sin il chastè da Razén ha mess la fam. en difficultads finanzialas ch'han sfurzà ella da vender il signuradi (1553). En Lumnezia han Conradin (1511) ed Ulrich (mastral Risch) occupà sis giadas l'uffizi dal mastral tr. il 1532 ed il 1556, e Rudolf è stà activ sco landrehter da la LG 1625-26 e 1640-41. En il 16. tsch. han ils de M. mess trais guvernaturs, in cumissari e tschintg podestats en las Terras subditas, en il 17. tsch. in vicari (Rudolf). La lingia restada en il Surses (Demarmels) è s'impoverida ed ha alura fatg part dal stan puril. Ils de M. èn stads tr. las fam. reticas las pli influentas dal 15. e 16. tschientaner.
 


Archiv:
ASGR.

Litteratura:
A. von Castelmur, Conradin von M. und seine Zeit, 1922; Grimm, Aristokratie; Simmen, Wappen, 154-56.

Martin Bundi

lemma precedents Marmels, Conradin deMarmels, Jon lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :