Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Punt OtaPunt Russein lemma sequent

Punt Renasca
Punt en la vischnanca da Seglias, attestada a l'entsch. dal 13. tsch. en l'index da las punts da l'uvestgieu da Cuira (Jura de Ponte Renasca), tud. Silserbrugg. Questa veglia punt sur l'Anugl, situada prob. da l'autra vart da la staziun odierna da Tusaun, è vegnida destruida pliras giadas d'auas grondas, ma era spustada e reconstruida repetidamain. La davosa punt, realisada en lain e doc. cun fotografia, è vegnida demolida da l'aua gronda il 1868. La P. colliava la Via Sura (Güglia) e la Via Sut (Spleia) sur il Rain Posteriur, ella n'era dentant betg uschè impurtanta per il traffic da transit. La via da transit principala era numnadamain quella sur Seglias e Munt S. Gion (Reziòlta). En il temp medieval colliava la P. la Tumleastga e la Mantogna che furmavan las duas parts dal signuradi episcopal ed era da muntada centrala per il traffic tr. Seglias e Tusaun e per ils abitants da la Mantogna e Stussavgia che utilisavan questa punt per ir en baselgia a Munt S. Gion (Reziòlta). Fin il 1526 è la punt vegnida mantegnida dals (anteriurs) subdits da l'uvestgieu residents en la regiun, a partir dal 1541 da la vischnanca da Seglias. Il 1868 ha il chantun Grischun laschà eriger ina nova punt en vischinanza dad Übernolla.


Litteratura:
P. Liver, Rechtsgeschichte der Rheinbrücke zwischen Thusis und Sils, en: BM, 1948, 97-144.

Adolf Collenberg

lemma precedents Punt OtaPunt Russein lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :