Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents ReziaRezia romana lemma sequent

Rezia
Questa noziun pretenda ina differenziaziun tr. la midada da significaziun inerenta e sia applicaziun per designar epocas istoricas. Ils scripturs rom. numnavan Raeti ils pievels muntagnards residents al sid da las Alps (Rets). A partir dal 2. tsch. s.C. è il num vegnì extendì sur tut ils pievels da la provinza rom. Raetia. Per Plinius e Livius eran ils Rets Etruscs stgatschads dals Gals da la planira dal Po. La derivanza dals nums Raeti (pievel) e Raetia (pajais) è contestada, ma prob. è ella illirica u ligurica. La «Notitia Dignitatum» (manual da l'Imperi rom. cun register dals dignataris civils e militars, redigì suenter il 390) menziunescha la divisiun da la Rezia, sut l'imp. Diocletian, en ils dus districts administrativs Raetia prima e Raetia secunda. Il center da la Raetia prima era Curia Raetorum (Cuira), quel da la Raetia secunda Augusta Vindelicorum (Augsburg). La denominaziun Raetia prima et secunda è attestada fin il 1192. Dapi il temp medieval tempriv èn però s'etablids per la Rezia alpina redimensiunada, daventada facticamain francona pir enturn il 800, il num Raetia Curiensis, p.ex. il 865 Rhaetia major et etiam Curiensis ed expressiuns sumegliantas utilisadas fin viaden il 12. tschientaner. Sper questa furma cumpara dapi l'onn 831 era il num Curwala (Curvala) e Pagus Curiensis resp. Comitatus Curiensis. La noziun Curvala (era Curvalia, Crualla, Cruara), ch'aveva remplazza il num Raetia fin la fin dal 15. tsch., designava la regiun da l'uvestgieu da Cuira da quel temp anc da lingua rumantscha. En il 16. tsch. han duvrà ils umanists e cronists il num Rezia/Raetien per designar il territori da la Republica da las Trais Lias, inclus sias Terras subditas Vuclina, Buorm e Clavenna. Era la nova libertad da cretta e da conscienza vegniva numnada Libertas Rhetica. La tradiziun umanista vegn cuntinuada en la litteratura populara, p.ex. en «Rhetus, ilg velg Grischun» da Steffan Gabriel (1621) u en la poesia da Joseph Casanova «Cheu stevan ils Rhaetiers en pasch e ruaus» (19. tsch.) e surtut en las poesias per chant viril dal 20. tsch., p.ex. da Flurin Camathias («O Rezia, patria mia»; «Si sededesta, Rezia nossa»), da Gion Cadieli («Alla patria: Rezia, nobla tiar'alpina ...») e da Nuot Vonmoos («A mia Rezia»). La conscienza retica furma era la basa dal cudesch da chanzuns rum. «Rezia» per chors maschadads (1939). Dapi il 19. tsch. vegn duvrà l'adjectiv retic savens sco sinonim da grischun per numerusas firmas, instituziuns, interpresas ed events sco la Viafier retica, la Bieraria retica, l'Apoteca retica, il Museum retic, l'Ospital chant. retic, il «Freier Rätier», la Miss Raetia ed auter pli. En il senn istoric pli vast vegn el la finala applitgà da quest «Lexicon istoric retic». Il num Rezia designescha trais epocas e stgalims culturals: la Rezia dal temp preistoric (Preistorgia), la Rezia dal temp roman (Rezia romana) e la Rezia dal temp medieval (Currezia). Allusiun al passà retic dal Grischun fa il chantun Rezia, part da la Republica helvetica dal 1801-03.


Litteratura:
P.C. Planta, Das alte Raetien: staatlich und kulturhistorisch dargestellt, 1872; H. Dietze, Rätien und seine germanische Umwelt in der Zeit von 450 bis auf Karl den Grossen unter besonderer Berücksichtigung Churrätiens, 1931; E. Meyer-Marthaler, Rätien im frühen Mittelalter, en: Beiheft der ZSG, 1948; RN 2, 810 s.; W. Drack, R. Fellmann, Die Römer in der Schweiz, 1988; G. Scaramellini, Valtellina, Valchiavenna e Grigioni italiano: le radici comuni di una regione alpina, en: Quaderni Valtellinesi, 2007, nr 98/99, 11-13; M. Bundi, Rätische Landschaften, Alpensagen und Geschichte, 2009.

Martin Bundi

lemma precedents ReziaRezia romana lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :