Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Ott, Jakob vonOtto, Bernhard lemma sequent

Ott, von
Famiglia domiciliada dapi il 16. tsch. ad Aschera ed a Crusch, arrivada prob. da Tavau. A partir dal 1544 concurrenzavan ils O. cun la fam. indigena Aliesch d'Aschera per l'uffizi dal landamma dal chapitel (migiur dal chapitel catedral da Cuira) en il Partenz Dadora. Era suenter l'integraziun da la dretgira dal chapitel (dretgira dals canonis) en quella dominicala d'Aschera il 1556-66, cumparan ils O. repetidamain sco patruns dal bain dal chapitel ad Aschera (migiuria). Il 1677 han els acquistà tut ils bains e dretgs d'alp respectivs dal chapitel catedral.
Ils O. èn prest s'alliads cun las fam. pussantas da Crusch e da la LDD (Finer, Enderlin, Guler, Buol, Sprecher). Lur posiziun sociala è sa consolidada il 1588, al mument che Hercules von Salis, derivant da Suogl, è sa maridà en la fam. (1586) ed ha erigì sin il bain da sia dunna a Crusch l'uschen. Chasa gronda. Las chasas signurilas dals von Salis e dals O. han da qua davent marcà la fatscha dal vitg da Crusch.
Cuntrari als Salis che sustegnevan ils interess da la Frantscha en las Trais Lias represchentavan ils O. la partida spagn. e pli tard quella austriaca. Lur pussanza è dentant restada prevalentamain locala, e lur influenza en la LDD ed en las Trais Lias è stada limitada. La fam. ha adina puspè mess il landamma d'Aschera, dentant mo mintgamai trais giadas il bundslandamma resp. in uffiziant per las Terras subditas dal Grischun (fin il 1797).  
En il 19. tsch. han ils O. cumenzà ad experimentar cun interpresas, e blers comm. da la fam. èn emigrads. La residenza originara Zum Rosengarten a Crusch (numnada tenor in restaurant endrizzà en la chasa il 1871) è dapi il 1979 en possess d'ina fundaziun che maina qua in center cultural cun in museum da vallada, in archiv cultural ed in pitschen teater.


Litteratura:
C. Jecklin, Das Chorherrengericht zu Schiers, en: JHGG, 1919, 8, 18, 22, 24, 41-47; Gillardon, Zehngerichtenbund, 194, 223; P. Fravi, Das Herrennest Grüsch und sein Haus zum Rosengarten, en: Bü. Kal., 1985, 73-79; S. Niggli, Die Grüscher Adeligen und ihre Häuser, 1992; Simmen, Wappen, 319-21.

Florian Hitz

lemma precedents Ott, Jakob vonOtto, Bernhard lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :