Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Pasculaziun cuminaPass lemma sequent

Pasqual
Vischnanca polit., cirq. Tumleastga, distr. Rain Posteriur. Vitg aglomerà situà lung la via sin ina terrassa a dretga dal Rain Posteriur, cun ils aclauns da Dusch (fusiunà cun P. il 1648) e Canova. 1237 in villa Pascuals (copia), 1246 de Pascuals, tud. Paspels (uffiz.). 1808 245 abit.; 1850 323; 1900 302; 1950 350; 1960 286; 2000 409. Chats dal temp neolitic e dal temp roman. En il 13. tsch. furmava il chastè dad Alt-Sins (Sins) il center dal possess dals baruns de Vaz en la Tumleastga; el è vegnì demolì, ens. cun il chastè da Canova (Neu-Sins), en la Faida da Schons. Il 1527 ha P. cumprà ora ils dretgs signurils. Il chastè-baselgia da S. Luregn dal temp medieval tempriv, menz. il 1237, serviva da baselgia da vallada a la populaziun da la vart dretga da la val. La baselgia da S. Gion Battista datescha dal 1662. Mo Dusch è sa convertì al protestantissem a la fin dal 16. tschientaner. La chaplutta cat. da S. Maria Madlaina a Dusch appartegneva il 1508 a la claustra da Curvalda. Enturn il 1695 ha Johann Victor von Travers laschà construir il chastè da P. Fin il 1851 ha il vischinadi da P. fatg part dal cumin d'Ortenstein. Construcziun dal stradun 1896-97. A P. dominavan il 2005 allevament da muvel, l'agricultura, la pumicultura e la viticultura (20%) ed il sectur terziar (71%). Gronda activitad da construcziun en il novissim temp, causa la posiziun ruassaivla e sulegliva dal vitg. Part da la populaziun da lingua rum.: 1880 89,1%; 1980 19,8% (LM); 2000 3,7%/8,4% (ML/Lindic).


Litteratura:
Kdm GR 3, 102-17; Gem. GR, nr 105, 1983; Gem. GR, 2003, 226 s.

Jürg Simonett

lemma precedents Pasculaziun cuminaPass lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :