Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Siegrist, Gottlieb [Götti]SIG lemma sequent

Sievgia
Vischnanca polit., cirq. S., distr. Partenz/Tavau (avant il 2001 Landquart Sut), situada sin ina terrassa sin la spunda dretga a l'entrada en il Partenz, cun la fracz. da Ferrera-Pardisla e la staziun da viafier S.-Valzaina en il fund da la val. 1224 de Sevve, tud. Seewis im Prättigau (uffiz.). 1850 791 abit.; 1900 901; 1950 955; 1970 923; 2000 1'323. Munaidas dal 1. e 3. tsch. s.C. En il territori da S. sa chattan era las ruinas dal chastè da Fracstein (en la Clus) e da quel da Solavers (en vischinanza da Crusch), resortì d'in chastè cun baselgia. Ils dus chastels eran en possess dals signurs che regivan sur il Partenz Dadora: il chavalier d'Aspermont ca. 1300, ils conts da Toggenburg 1344-1436 (Fracstein era, sco serra da vallada, en possess cuminaivel dals Toggenburgs e Matschs), ils chastellans de Matsch 1436-96, alura ils ducas da l'Austria fin il 1649. Ils signurs feudals han possess vasts bains e dretgs a S., fin che la vischnanca è sa cumprada libra il 1649. Il 1436 è s'unida la dretgira d'Aschera-S. a la LDD nov fundada. Il 1679 è ella vegnida dividida, ed il 1851 è sa furmà il cirquit da S. da la mesa dretgira da S. (cun Valzaina Dadens). La veglia baselgia parochiala per S. e Fanas era quella da S. Maria dal chastè da Solavers. En las duas vischnancas èn naschidas baselgias affiliadas ch'èn s'emancipadas formalmain il 1487. La baselgia da S. Luregn a S., attestada il 1483, è vegnida transfurmada il 1756-58. La chaplutta da S. Aprus a Fracstein, menz. il 1370, è restada ina filiala d'Aschera. Il 1587 è vegnida introducida la refurmaziun a S. A Stürfis èn sa domiciliads Gaulsers tr. il 14. tsch. e l'entsch. dal 17. tsch., lur baselgia, deditgada a s. Niclà, era ina filiala da Maiavilla. Dal 17. fin il 19. tsch. ha la fam. von Salis-Seewis gì ina gronda influenza a S. Ella possedeva tr.a. il bogn da Ganey, situà a 1300 m, frequentà en il 17. e 18. tsch. e destruì il 1799. La vischnanca da S. è vegnida destruida duas giadas: il 1622 tras in incendi provocà tras ils Austriacs (tr.a. sco resposta a l'assassinat da Pader Fidelis von Sigmaringen), il 1863 tras in ulteriur incendi. L'emprima chasa da scola dal vitg datescha dal 1685. La via da colliaziun Pardisla-S., construida il 1858 (schlargiament 1980-92), ha obtegnì il 1889 in access a la Viafier retica. Da la buna colliaziun han profità il traffic da cura (chasa da cura dapi il 1865, oz center da reabilitaziun) ed il turissem. Cun il center d'industria e da commerzi en il fund da la val (Georg Fischer SA) han ins pudì crear numerusas plazzas da lavur en il sectur secundar. En il sectur primar predomineschan l'allevament da muvel e l'economia da latg (chascharia da model dapi il 1870). S. posseda era numerusas alps. En ils onns 1850 han la vischnanca e privats cumprà ils bains da la fam. Salis, nua ch'ins ha construì numerusas chasas d'abitar a partir dal 1863. Il chastè dals Salis, che datescha dal 1630, vegn oz utilisà sco chasa com. e sco chasa da scola. Meglieraziun gen. 1962-2000.


Litteratura:
J.U. Meng, Seewiser Heimatbuch, 1967 (1978²); Gem. GR 2003, 308 s.; H. Stricker e.a., Die Seewiser Flurnamen, 2010.

Adolf Collenberg

lemma precedents Siegrist, Gottlieb [Götti]SIG lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: