Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents RaetusRagaz [-Nadig], Clara lemma sequent

Ragaz, Leonhard
* 28-7-1868 a Tumein, † 6-12-1945 a Turitg, ref., da Tumein. Figl da Bartholome, pur, e da Luzia n. Färber. ∞ 1901 Clara R. n. Nadig. Scolas a Tumein e Cuira, alura stud.teol. a Basilea, Jena e Berlin. Plevon sin la Mantogna 1890-93, a Cuira 1895-1902 ed al Münster da Basilea 1902-08, tranteren magister a la Scola chant. a Cuira 1893-95. Gia a Cuira aveva il plevon teologicamain lib. sviluppà in sensori per dumondas socialas. Sut l'influenza da Christoph Blumhardt è il messadi dal reginam da Dieu sin terra daventà ina sfida teologica e politica. Il 1906 è R. sa participà a la naschientscha dal moviment religius-social sco era a la fundaziun da la revista «Neue Wege» ch'el ha dirigì sco schefredactur dal 1921 fin a sia mort. A partir dal 1908 è el stà activ sco prof. da teologia sistematica e pratica a l'Univ. da Turitg. Ils pass decisivs per l'avischinaziun al moviment dals lavurers ha el fatg cun sa solidarisar il 1903 a Basilea cun ils lavurers da construcziun en chauma e cun sustegnair il 1912 a Turitg la chauma generala. En il moviment internaz. dal socialissem religius è el daventà ina figura centrala. Cunter tendenzas marxisticas e statalas centralisticas represchentava R. in socialissem federalistic, cooperativ e pacifistic. Il 1921 è el sa retratg da sia professura ed è sa deditgà a la lavur da scolaziun en il quartier da lavurers Aussersihl ed al moviment religius-social. Sco pres. dal Post central svizzer per la lavur da pasch è el stà in dals exponents dal moviment antimilitaristic per la pasch en Svizra. Cura che la partida socialdem. ha acconsentì il 1935 a la defensiun militara dal pajais, è R. sortì - ens. cun sia dunna - da la partida (adesiun 1913). Gia baud ha el tschertgà il dialog cun il giudaissem, ed el refusava l'antisemitissem sco era il naziunalsocialissem uschè energicamain sco las tendenzas conformisticas en Svizra, cunter las qualas el ha auzà la vusch ad ina critica profetica. En ils onns 1941-44 ha el fatg publitgar illegalmain las «Neue Wege», perquai ch'el n'era betg pront da sa suttametter a la precensura prescritta. Cun sia teologia dal reginam da Dieu, annunziada adina cun engaschament politic, ha el anticipà concepziuns da la teologia da la liberaziun. 


Archiv:
StAZH.

Ovras:
Dein Reich komme, 1909; Die neue Schweiz, 1917; Die Bibel - eine Deutung, 7 ts, 1947-50; Mein Weg, 2 ts, 1951-52; Leonhard R. in seinen Briefen, 3 ts, 1966-92; Eingriffe ins Zeitgeschehen, 1995.

Litteratura:
M. Mattmüller, Leonhard R. und der religiöse Sozialismus, 2 ts, 1957-68; M. Böhm, Gottes Reich und Gesellschaftsveränderung, 1988; W. Spieler e.a., Für die Freiheit des Wortes, 2009, 27 s.

Ruedi Brassel-Moser

lemma precedents RaetusRagaz [-Nadig], Clara lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :