Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Salis, Ulysses von (Marschlins)Salis, Vincenz Guido von (Samedan) lemma sequent

Salis, Ulysses von (Marschlins)
* 25-8-1728 sin il chastè da Marschlins, † 6-10-1800 a Vienna, ref., dad Eigias e Turitg. Figl da Johann Gubert Rudolf e da Perpetua n. von S.-Soglio. Frar dad Anton. ∞ Barbara Nicola n. Rosenroll, figlia da Rudolf, vicari, descendent da la chasa da spediziun a Tusaun. S. ha passentà sia giuventetgna o.t. a Clavenna e Suogl. Suenter in'instrucziun privata e viadis da furmaziun, ha el studegià giurisprudenza a Basilea 1745-46. Suenter 1755 èn cumparidas sias ovras politicas ed economicas che sa basan sin ideas aristocratic-patrioticas. Las lavurs giuridicas eran savens expertisas da conflicts en las Trais Lias sco era giudicats dals dretgs suverans da la Republica en las Terras subditas.
Suenter il 1759 ha S. promovì la filandaria da mangola manada tenor il sistem d'ediziun; quest'iniziativa ha dentant fatg naufragi, gist sco sia idea d'allevar a Marschlins larvas da rasulaunas da saida. S. è stà comm. e pres. da la Societad helvetica dal 1770-71 e steva en stretg contact cun Isaac Iselin e Johann Caspar Hirzel. El è s'engaschà per in augment da la racolta en l'agricultura, ed il 1778 è el stà confundatur da la Societad dals amis da l'agricultura. A la fin dals onns 1770 ha el promovì la drenascha a Castione en Vuclina. En il senn da Franz Urs Balthasar, ch'aveva pretendì l'instituziun d'ina "plantera" per futurs politichers dad omaduas confessiuns, ha el sustegnì il 1763 l'avertura dal Seminari a Lantsch Sut, transferì a Marschlins il 1771. Suenter la mort da Planta (1772) ha el surpiglià temporarmain la direcziun pedagogica da quel ed ha transfurmà il 1775 la scola en in institut filantropin tenor il model da Basedow (Filantropins). Il 1777 ha el stuì serrar l'institut per motivs finanzials. Il 1749 ha S. occupà per l'emprima giada in uffizi en la dretgira dals Quatter Vitgs, nua ch'el è stà pli tard era mastral. Dal 1757-59 è el stà podestat a Tiraun ed ha manà en ils onns 1761-62 la delegaziun grischuna per la renovaziun dal Terz Capitulat da Milaun (1763). La cunvegna, che privilegiava la politica da traffic austr. ed ils S. cun lur vast possess en Vuclina, ha provocà in'opposiziun rinforzada cunter lur politica da pussanza dinastica. Ils interess da la fam. han pudì sa far valair en l'Affar da Tumegl dal 1766. Il 1768 è S. vegnì delegà da la Frantscha tar las Trais Lias (numnà solitamain "minister"), quai ch'ha irrità ils aderents etablids da la partida franzosa. Dal 1771-75 ha el impedì - cunter ils interess austr. - il project d'ina via da Clavenna a Danuder, sviluppà da ses adversari principal Peter Conradin Constantin von Planta. Prob. sin iniziativa dals Patriots refurmists ha S. pers il 1792 il post da minister franz. sco era sia cumpagnia da mercenaris en servetsch franzos. Il 1794 è el vegnì cità davant la radunanza extraordinaria da las Trais Lias e bandischà, suenter sia fugia, sco proscrit da la "dretgira nunpartischanta". L'annexiun da la Vuclina a la Republica cisalpina (1797) ha chaschunà ad el grondas perditas. Da ses bain rural Eckbühl sper Höngg (oz citad da Turitg) agitava el cunter ils Patriots e l'annexiun dal Grischun a la Republica helvetica. Il sett. 1799 è el fugì a S. Gagl e da là a Vienna.
S. è stà il Grischun il pli influent en la segunda mesadad dal 18. tschientaner. Sco illuminist en il senn dal patriotissem aristocratic ha el prestà lavur refurmatorica en ils secturs da la publicistica, da l'economia e da l'educaziun. S. n'era betg sulettamain in idealist visiunaric, ma era activ en la politica reala. Sia virtuusitad sco diplomat ha contribuì a la realisaziun dal Terz Capitulat da Milaun cun l'Austria; mo pauc pli tard ha el limità l'influenza austr. cun s'orientar a la Frantscha. Tut sias activitads stuevan era servir al rinforzament da la stirpa dals S. L'opposiziun ch'è naschida en ils onns 1760 cunter la pussanza dinastica da quella ha pudì sa far valair pir en consequenza dal eveniments revoluziunars ch'han effectuà in'orientaziun da S. vers il champ austriac.

 


Ovras:
Fragmente der Staats-Geschichte des Thals Veltlin und der Grafschaften Clefen und Worms, aus Urkunden, 2 ts, 1792; Bildergallerie der Heimweh-Kranken, 3 ts, 1798-1803 (1823-27³).

Litteratura:
Geneal. Salis, tav. 11/35; A. Rufer, Das Ende des Freistaates der Drei Bünde, 1965, 1-23; Bedeutende Bündner 1, 303-15; P. Metz, Ulysses von S.-Marschlins, 2000; R. Theus Baldassarre, Diplomatie und Aufklärung: Ulysses von S.-Marschlins, en: BM, 2001, 8-33.

Jürg Simonett

lemma precedents Salis, Ulysses von (Marschlins)Salis, Vincenz Guido von (Samedan) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :